Era de maggio e te cadeano 'nzino

a schiocche a schiocche li ccerase rosse...

Fresca era ll'aria e tutto lu ciardino

addurava de rose a ciente passe.

Era de maggio - io, no, nun me scordo -

na canzone cantàvamo a ddoje voce:

cchiù tiempo passa e cchiù me n'allicordo,

fresca era ll'aria e la canzona doce.

E diceva: "Core, core!

core mio, luntano vaje;

tu me lasse e io conto ll'ore,

chi sa quanno turnarraje!"

Rispunnev'io: "Turnarraggio

quanno tornano li rrose,

si stu ciore torna a maggio

pure a maggio io stonco ccà".

E so' turnato, e mo, comm'a na vota,

cantammo nzieme lu mutivo antico;

passa lu tiempo e lu munno s'avota

ma ammore vero, no, nun vota vico.

De te, bellezza mia, m'annammuraje,

si t'allicuorde, nnanze a la funtana:

l'acqua llà dinto nun se secca maje,

e ferita d'ammore nun se sana.

Nun se sana; ca sanata

si se fosse, gioia mia,

mmiezo a st'aria mbarzamata

a guardare io nun starria!

E te dico - Core, core!

core mio, turnato io so':

torna maggio e torna ammore,

fa de me chello che buo'!